Spiel und Spass i de Halle

Liebi Mitglieder vo Fortilegends

Mit dem erste Blogitrag und em erste offizielle Event als Verein (!!!) heissi eu herzlich willkomme uf Fortilegends.ch

I dem Blogpost wömmer üs anen super erste Event als Verein zrugerinnere. Und zwor hemmer de Afang vom Verein genau glich wöle mache wie die ursprünglich Entstehigsgschicht vom Verein. Und zwor zeme ine Turnhalle üs go ustoobe. Dazumals hets i Flowil mitem Event Turnhalle (Flawil) Battle agfange, Samstig 4. Februar 2023. Jo würkli 2023, da het mi au gflasht. Oder hani de erst Termin nüm gfunde? Lohs mi wüsse, dasmer üsi Gschicht suber chönd dokumentiere ^^.

Intro

Aso guet, dazumals in Flowil und hüt? Eifach in Gossau. Genau wommer aneghöred. Und weisch wa? Will mer en offizelle Verein sind hemmer eifach e Halle bi de Stadt Gossau chöne afordere und voilà. Do simmer gsi. 5. April 2025. 2 Johr spöter und ufgstiege uf neuem Level. Genau wie dazumal (7x Meistertitel über 8 Saisons). Agfange hets miteme chline Sight-Seeing Tüürli dur Gossau. D'Fuessballtribüni vom FC Gossau het jetzt eifach en Turm (WTF?). Und au suscht chunt die neu Sportwelt langsam zeme. Throwbacks a de ganz Scheiss wommer dazumals im Buechewald verbroche hend sind natürli au mitgschwelgt.

Ersti Boxestop

Wiiter isches uf direktem Weg (schöne Spaziergang gsi, viel über Lidl glernt) is Kaffi Zitlos gange. Anschiinend isch döt die ghobe Alkoholikerszene vo Gossau unterwegs (lol). Da isch Perfekt für üs gsi. Gedeckt getarnt unter glichglebte simmer am Hose ab spiele und Bierli trinke gsi. De Hallesport brucht jo au volli Energietänk!

Early Birds im Kaffi Ziitlos am Hose Abe spiele. Kei Angst, alles SFW

Ab id Halle

Pünktlich uf di 14-Hundert hemmer üs mit allne wo spöter dezuegstosse sind i de Hirschberg-Halle troffe. I sportlichem Tempo isches direkt wiiter id Halle wommer nebet em Klassiker Metzgerball üs au mit Würfel-Fuessball, Softhandball und Elefantevolleyball vergnüegt hend. De Konditionsunterschied zwüsched de Ex- und aktive Handballer isch zwor sichtbar gsi. Am Schluss isch aber jede is Schwitze cho und Spass hemmer sowiso gha. Cool gsi wieder mol i alter Formation i de Halle stoh.

Fix und fertig am Schluss - aber alli happy!

Apero

Nöchsts Traktandum isch en chline Apero i de Garderobe und Umgebig gsi, begleitet mit gmüetlichem Dusche und tüüfe Gspröch über vergangeni Ziite und gmeinsam Erlebts. Nocher hemmer üs uf de Weg zum Restaurant Egli begeh um döt en gebührende Abschluss zfiire!

Königlicher Znacht am Festbank

Im Restaurant Egli sind nomel e gueti Ladig Legende dezuegstosse wos nöd uf d'Halle gschafft hend. Freudig hemmer üs churz begrüesst mitere chline Ahsproch vom Präsi und sind aschlüssend is Restaurant Egli ine um döt de Obig no würdig fertig zfiire. Kulinarsch simmer definitiv nöd zchurz cho. Vorspies us huusgmachte Delikatesse, Wiibegleitig und absolut bombastischi Hautpmohlziite (Cordbleu Empfehlig vo mer) hemmer üs de Obed versüesse (oder versalze?) loh. Und natürlich hend de Ustuusch mit üsne Vereinsmitglieder s'Ganze erst so schö gmacht. Isch immer wieder cool zum gse wos ali anetriebt. Unterschiedlicher chönt de Huufe nöd si. Vo Profisportler, Studente, wöschechti Büetzer, Bürofuzzis, Finanzprofis und Selbstständige hemmer alles. Eigentli sötemer als nöchst e Firma zeme ufmache (!)...

Ha nur e Bild vo de Pommes, willmer dihei genau s'glich Gschirr hend. Da hani natürli am Mami wölle zeige :-D

Für die Nimmersatten

Natürli hends wieder mol nöd alli gse und so het sich den es Grüppli nochem Znacht no uf St.Galle abgsetzt zum die letschte Gspröch fertig zrede und unter liechtem Alkoholifluss undere Priise gsunder Arroganz no chli de Sinn vom Lebe neu definiert hend. Wünderschöne Obed gsi Jungs!!! Uf baldigs wiedersehe.